photo | Froilan Marquez

BAGUIO CITY – Kinuwestionaran ti maysa a transport group iti Cordillera Region ken Ilocos Region ti implementasyon ti Memorandum Circular 2021-008 ti Department of Transportation (DOTr) – Land Transportation Franchising and Regulatory Board (LTFRB) a nakailanadan dagiti pagalagadan iti Public Utility Vehicle (PUV) Service Contracting Program para kadagiti public utility buses a mangidiaya ti libre a transportasyon kadagiti medical health workers.

Iti interview ti Bombo Radyo Baguio, kinuna ni Froilan Marquez, Vice President ti Liga ng Transportasyon at Operator ng Pilipinas-Cordillera and Region 1 nga iti nasao a memo ket nalawag a dagiti parapasahero a bus ti prayoridad iti PUV Service Contracting Program.

-- Advertisement --

Nupay kasta, maladingitan dagitoy gaputa iti lokalidad ket naipangruna iti nasao a programa dagiti modernized units kas kadagiti moderno a jeep nga addaan laeng ti provisional authority.

Kinunana a daytoy ti pakakitaan a maipangpangruna dagiti sumursurot iti PUV Modernization Program ti gobyerno iti baet nga ad-adu dagiti stakeholders ti transport sector a naapektaran iti nasao a programa.

Dinakamatna metlaeng a dagiti drivers ken operators dagiti parapasahero a bus ken UV Express ket nabayagen nga agbaybayad ti buis iti gobyerno ngem dagitoy ti arigna naiyaw-awan ita iti PUV Service Contracting Program.

Inyunay-unayna pay a kaasi dagiti parapasahero a bus ken dagiti UV Express iti Cordillera nangruna dagiti agbibiahe iti inter-region gaputa awan pay ti nailukat ken naipalubos a biyahe dagitoy.

(ni Froilan Marquez, Vice President ti Liga ng Transportasyon at Operator ng Pilipinas-Cordillera and Region 1 )

Nupay maawatanda a sursuruten laeng ti Cordillera Regional Office ti LTFRB ken DOTr ti pammilin ti central office dagitoy, impalagip ni Marquez nga iti R.A 11494 wenno Bayanihan to Recover as One Act a nakailatangan ti P5.580-B para iti transport sector ita a pandemya ket awan ti nailanad a dagiti laeng nagtungpal ken madama nga agar-aramid ti addang tapnu agmoderno ti maipangruna nga agnumar iti daytoy.

Nailanad met iti Memo Circular 2021-022 nga impaulog ti DOTr-LTFRB ti panakainayon dagiti modernized jeep, modernized UV Express ken tourist vans iti PUV Service Contracting Program.