BAGUIO CITY – Iggem ita ti Benguet Police Provincial Office (PPO) dagiti pakabigbigan dagiti suspek a responsable iti panakatakaw dagiti baterya dagiti lugan iti sumagmamano a lugar iti probinsia ti Benguet itay nabiit.

Iti panakiuman Bombo Radyo Baguio kenni PCol. Reynaldo Pasiwen, dadaulo ti Benguet PPO, imbutaktakna a maysa a grupo a buklen ti uppat nga indibidual ti bambantayanda iti agdama mainaig iti nasao a panagtakaw.

-- Advertisement --

Kinunana a naduktalan iti imbestigasyonda nga agrikrikos ti grupo kadagiti nagduduma a munisipyo ti Benguet tapnu takawen ti baterya dagiti nakaparada a lugan.

Dinakamatna a karaman ti Buguias, Tublay, La Trinidad, Atok, Bakun ken Bokod kadagiti posible a nagdakiwasan dagiti suspek gaputa dagitoy a munisipyo ti nakailista ti agpapada nga insidente.

(ni PCol. Reynaldo Pasiwen, dadaulo ti Benguet PPO)

Inaklonna met a nabayagen a mapaspasamak ti nasao a kita ti krimen ngem ita laeng a maiyum-uman iti pulisya isut gapuna a saan a dagus a naaksionan dagiti otoridad dagiti napalpalabas nga insidente.

Nupay kasta, impasiguradona ti agtultuloy a panagwanawanda kadagiti masakupanda a lugar.

Kidkiddawen pay ni Col. Pasiwen ti nainget a koordinasyon ti publiko iti pulisya partiuklar ti panangiyumanda a dagos kadagiti kapada nga insidente para iti dagus a panagaksion dagiti otoridad.