-- ADVERTISEMENT --

BAGUIO CITY – Dinadael ti Department of Trade and Industry (DTI) dagiti uncertified ken sub-standard a construction materials, pakairaman ti steel bars a nakumkumpiskar dagitoy iti maysa a pagtagilakuan iti siudad ti Baguio.

Sigun kenni Atty. Samuel Gallardo, dadaulo ti DTI – Baguio-Benguet, dagiti nadadael ket buklen ti dumanon iti 1,000 a pidaso nga 10mm nga steel bars nga aggatad ti P140,000.

Kinunana a naduktalan ti Enforcement Team ti DTI kabayatan ti panagsukimat ken panag-sample dagitoy a saan a nasurot ti linteg mainaig iti umno a rukod, dagsen ken kaatiddog dagiti nakumpiskar nga steel bars gaputa saan dagitoy a pimmasa iti Product Standard (PS).

Innayonna nga awan pay ti markings kas iti PS license ken ICC stickers a rason no apay a kinumpiskarda dagiti nasao a materyales.

Sigun pay kenkuana, maipilaan ti kaso nga administratibo ti agtagikua iti establishimento a nakakumpiskaran dagiti sub-standard a construction materials ken mapatawan pay ti multa a P25,000 para iti umuna a gundaway a panalabsing iti linteg.

-- ADVERTISEMENT --

Impettengna nga adun dagiti programa nga insayangkat ti DTI tapnu mapalagipan dagiti agilaklako ti construction materials mainaig iti Product Standard Law ngem adu latta ti aglablabsing iti daytoy.

Nairaman metlaeng kadagiti nadadael dagiti nakumpiskarda a tangke ti LPG, electrical tapes ken LED lamps bayat a maipaima dagiti nadadael a landok iti junk shop a nangabak iti bidding para iti daytoy.

Iti agdama, agtultuloy ti panaginspeksion ken sampling nga isaysayangkat ti DTI kadagiti construction materials a mailaklako iti lokalidad tapnu masalwadan dagiti konsyumer. (-report ni Bombo Janice Juanito)