-- ADVERTISEMENT --

BAGUIO CITY – Dinadael dagiti operatiba ti pulisya ti pakabuklan a P13.22-M a gatad dagiti pinuon ti marijuana iti dua nga aldaw nga eradication operation iti communal forest sadiay Tableo, Badeo, Kibungan, Benguet itay laeng nabiit.

Sigun kenni Benguet PPO Provincial Director PCol. Reynaldo Pasiwen, nadiskobre dagiti operatiba dagiti pagmulaan ti marijuana bayat ti panagpatrolyada iti kabambantayan ti Kibungan.

Immuna a pinarut ken inuram dagiti otoridad ti 2,100 a dadakkel a pinuon ti marijuana nga aggatad ti P420,000 manipud iti maysa a pagmulaan nga addaan kalawa a 300 metro kwadrado.

Nadiskobre metlaeng iti nasao a disso ti 10 a kilo ti napagango a pinuon ti marijuana nga aggatad ti P1.2-M.

Simmaruno a pinarut ken inuram dagiti operatiba ti 28,000 a dadakkel a pinuon ti marijuana nga aggatad ti P5.6-M manipud iti maysa pay a pagmulaan nga addaan kalawa a 4,000 metro kwadrado.

-- ADVERTISEMENT --

Nasarakan pay iti nasao a disso ti 50 a kilo ti napagango a pinuon ti marijuana nga aggatad ti P6-M.

Maipalagip nga inkari dagiti anti-illegal drug operatives ti panagaramidda iti amin a kabaelanda tapnu agballigi ti kampanya ti gobyerno kontra iti iligal a a droga ditoy rehiyon Cordillera.