BAGUIO CITY – Nagkalintegan dagiti barangay officials ti Fairview Barangay kasaruno ti naipablaak iti social media seknan iti panagrikep ti barangay hall dagitoy iti agsapa ti Biyernes, Enero 8 idi napalabas a lawas.

Iti nasao a post, kiniddaw ti maseknan ti panangikonsidera dagiti barangay officials ti Fairview kadagiti residente sadiay a nagpila iti barangay hall tapnu agala kadagiti dokumento kas iti cedula ngem alas nueben ti agsapa ket saan pay a nakalukat ti barangay hall.

Nupay inaklon ti post nga adda ti advisory nga aglukat ti barangay hall iti ala-una ti malem, kinuwestionaran latta ti nag-post no sadino ti nakaisayangkatan ti taripnong a dinar-ayan dagiti barangay officials idinto a nakalukat ti barangay halls dagiti kabangibangda a babbarangay.

-- Advertisement --

Iti met interview ti Bombo Radyo Baguio, impetteng ni Kagawad Emil Flores a saan a nagrikep ti barangay hall ti Fairview iti nasao nga aldaw gaputa adda ti nadutukan a mangilukat iti pasdek iti agsapa ti Biyernes.

Sigun kenkuana, napateg ti dinar-ayanda a re-orientation iti drug clearing process nga inorganisa ti BCPO-Station 1.

Dinakamatna a posible a nasapa unay ti nagreklamo wenno saan ket naladaw laeng a nagturong iti barangay hall ti nadutukan a mangilukat iti pasdek.

Sigun pay iti barangay treasurer, nangipablaak met daytoy iti social media iti advisory iti panagrikep ti barangay hall iti agsapa ken nangipaskilda pay iti paka-ammo iti ridaw ti barangay hall.