-- ADVERTISEMENT --

BAGUIO CITY – Saan pay a maituloy ti operasyon dagiti sumagmamano a negosyante iti nalatak a Burnham Park ditoy siudad ti Baguio iti laksid a nailukaten iti publiko ti nasao a pagpasyaran.

Sigun kenni City Environment and Parks Management Office (CEPMO) head Atty. Rhenan Diwas, resulta daytoy ti nalimitaran a bilang dagiti negosyante a mabalin nga agtuloy iti operasyon iti biking ken boating areas ti Burnham Park.

Kinunana a kas maibasar iti napagnunumuan ti CEPMO ken dagiti maseknan nga opisina ket 15 laeng a bisekleta ti mabalin nga ipaabang ti tunggal bike operators, doble a naksayan manipud iti sigud a 30 a yunit nga ipapaabang dagitoy.

Innayonna a dua laeng a concessionaire ti mapalubosan nga aglukat iti operasyon iti boating area.

Inlawlawag ni Atty. Diwas a paset daytoy ti inisyatibo ti lokal a gobierno tapno mamintinir latta ti panakaobserbar ti social distancing iti nasao a parke.

-- ADVERTISEMENT --

Maipalagip a mangrugrugi ti operasion ti biking area tunggal alas-6 ti agsapa agingga alas-7 ti rabii.