BAGUIO CIty – Agarupen iti uppat a gasut nga accomodation establishments iti siudad ti Baguio ti naipaayan iti permit to operate wenno pammalubos a mangituloy iti operasyonda ita a pandemya.

Iti interview ti Bombo Radyo Baguio, kinuna ni City Tourism Officer Engr. Alec Mapalo a maragsakan daytoy gaputa nakita ken naobserbaranna ti panagtitinnulong dagiti tourism-related establishments tapnu makatungpalda kadagiti nainget a pagalagadan a naituding a suruten dagiti tourism-related establishments iti operasyon dagitoy.

-- Advertisement --

Dinakamatna a nainget ti panagtungpal dagiti hotels, transients, inns ken homestays iti siudad iti standing policy dagitoy nga awan kadagiti turista ti mapalubusan nga ag-check-in iti pasdekda no saan dagitoy a dimmalan iti triage.

Kinunana a mapasubli iti triage center dagiti turista nga ag-check-in kadagiti pagdagusanda no awanan dagitoy iti pammaneknek a naipasidongda iti triage.Nupay kasta, mailaksid iti nasao nga standing policy dagiti residente iti lokalidad nga agturturong kadagiti accomodation establishments a mangididiaya iti ‘staycation’.

ni City Tourism Officer Engr. Alec Mapalo

Maipalagip a naipaayan iti pammalubos nga agtuloy iti operasyon dagiti hotels ken transient houses ditoy siudad kalpasan a nasukimat ti panagtungpalda kadagiti naipaulog a pagaladagan tapnu agtalinaed a natalged dagiti turista ken dagiti umili manipud iti panagwaras ti COVID-19.

Agtultuloy met ti panangwanawan ti lokal a gobyerno ti Baguio ken ti Department of Tourism iti panagsurot dagiti tourism-related establishments iti siudad kadagiti pagalagadan iti operasyon dagitoy para iti agtultuloy a panagrekober ti industriya ti turismo iti lokalidad.