BAGUIO CITY – Nailaylayon ti panakailukat wenno operasyon ti sumagmamano a tourism sites ti Tublay, Benguet.

Maibasar iti pammilin nga impaulog ni Mayor Armando Lauro, maituloy ti panakailukat dagiti tourism sites sadiay agingga inton February 7 ken nainget a masurot dagiti pagalagadan a linaon ti Executive Order a nangipalubos iti panaglukat dagiti nasao a pagpasyaran.

Sagudayen ti pammilin dagiti naipalubos a kaadu dagiti maakomodar iti tunggal tourism site ken ti oras ti panaglukat dagitoy.

-- Advertisement --

Maipalagip a karaman kadagiti nailukat a tourism site ti Tublay ket ti Asin Hotspring, Ahonda Caves, Rock Formation and Jungle Adventure, Balete Tree, Ridge Cafe ken ti Polig’s Berry Farm.

Inyunay-unay ni Mayor Lauro a dagiti nasao a destinasyon ket nailukat laeng kadagiti residente ti Benguet.

Sigun kenkuana, kasapulan laeng a mangiparang dagiti agpasyar iti valid I.D a nakailanadan ti address-da tapnu mapaneknekan a dagitoy ket residente ti Benguet.