-- ADVERTISEMENT --

BAGUIO CITY – Natiliw ti maysa a drug personality iti buy-bust operation sadiay Melvin Jones, Burnham Park, Baguio City idi kalman.

Nabigbig daytoy a ni Aking Mal-in Garlejo, 20-anyos, baro, online seller ken residente ti Upper Poblacion, Tuba, Benguet

Nakumpiskar kenkuana ti dua a pakete ti maatap a bulbulong ti marijuana nga agdagsen ti agarup nasurok lima a gramo ken maysa a balkot ti maatap a bulbulong ti marijuana nga agdagsen ti agarup nasurok 40 a gramo.

Narekober iti ikotna ti naaramat a buy-bust money.

Kabayatanna, natiliw met iti buy-bust operation sadiay Agbannawag, Tabuk City, Kalinga idi kalman ti maysa kadagiti Top Ten Drug Personality iti Cordillera Region.

-- ADVERTISEMENT --

Nabigbig daytoy a ni Douglas Jefferson Guisob Lomase, 39-anyos, sales representative ken residente ti nasao a lugar.

Nakumpiskar iti operasyon ti dua a pakete ti maatap a shabu nga agdagsen ti agarup nasurok maysa a gramo nga aggatad ti agarup P7,000.

Narekober metlaeng iti ikotna ti naaramat a buy-bust money.

Iti agdama, sumangsangon dagiti dua iti kaso a panaglabsing iti RA 9165 wenno Comprehensive Dangerous Drugs Act of 2002.