BAGUIO CITY – Nangrugin ti “No QR Code, No Entry” Policy iti Baguio City Hall ken nangitunda daytoy iti atiddog a pila iti sangwanan ti pasdek.

Maitunos daytoy iti MEMORANDUM NO. 18, SERIES OF 2021 nga impaulog ni Mayor Benjamin Magalong a paset ti panagannad ti siudad manipud iti COVID-19.

Sigun kenni city permits and licensing division chief Allan Abayao, nasken nga agrehistro iti Baguio In My Pocket application dagiti adda ti transaksionda iti City Hall.

-- Advertisement --

Kinunana nga apaman a makarehistro ti maysa nga umili ket maipaayan daytoy iti QR Code nga iparangda iti entrace ti City Hall sakbay daytoy a mapalubusan a sumrek iti pasdek.

Sakupen ti polisiya dagiti amin nga empleyado ti lokal a gobyerno ti Baguio ken dagiti kliyente nga adda ti transaksionda iti Baguio City Hall.

Innayonna pay nga adda dagiti registration booths kadagiti designated stations iti aglikmot ti Baguio City Hall tapnu matulongan dagiti saan pay a nakarehistro iti Baguio In My Pocket citizen portal application.