BAGUIO CITY – Nasayaat ti kasasaad dagiti Pilipino nga agnanaed ken mangmangged sadiay Nepal iti baet ti epekto ti COVID-19 crisis.

Iti interbyu ti Bombo Radyo ken ni Bombo International Correspondent Eva Nancy Thapa, maysa a Pinoy immigrant sadiay Kathmandu, Nepal, kinunana a nababa pay ti kaso ti COVID 19 sadiay a dumanon iti 59 ken 16 dagiti nakarekober.

-- Advertisement --

Kinunana nga awan ti naipadamag a Pilipino a nakaptan iti nasao a virus sadiay.

Nupay kasta, kinunana nga apektado dagiti negosio ken kompania kas iti bukodna a negosio a temporario a nairikep.

Kinunana a saan unay nga adu dagiti Pilipino sadiay Nepal nangruna ta bassit ken nakurapay daytoy a pagilian kas met laeng iti Pilipinas.

Nupay kasta, kinuna ni Thapa nga adu dagiti organisasion sadiay Nepal a tumultulong kadagiti apektado iti COVID 19 crisis ken saan a parikot sadiay ti taraon.

Kinunana a maysa kadagiti parikot dagiti Pilipino sadiay ket ti kinaawan ti remittance center a mabalin a pagpaw-itanda iti kuarta para iti pamiliada ditoy Pilipinas.

Iti baet daytoy, kinunana nga ipampamuspusanda ti panagpaw-itda iti kuarta tapno masuportaranda latta ti pamiliada ditoy Pilipinas.