BAGUIO CITY – Saanen a kasapulan a maiparang ti negatibo a resulta ti swab test dagiti truckers nga agibibiahe ti nateng a dumalan sadiay La Union.

Nailanad daytoy iti kabarbaro nga Executive Order No. 13, series of 2021 nga impaulog ti lokal a gobierno ti La Union a naglaon iti Border Control Policies sadiay.

-- Advertisement --

Nupay kasta, nasken nga ipakita dagiti dumalan laeng sadiay La Union ti antigen test result wenno aniaman a negative test result a kasapulan ti destinasyon dagitoy a lugar.

Naibilin metlaeng kadagiti delivery vehicles ken cargoes ti panangiparangda iti delivery manifest wenno katukad a dokumento; kasapulan a dokumento iti destinasyon a lugar ken saan a lumabes iti tallo nga oras sakbay a makadanon iti exit ti probinsia.

Saanen kasapulan ditoy ti negatibo a resulta dagiti test ken liklikan ti bumaba sadiay La Union.

Nailanad pay iti baro nga Exectuive Order nga amin a dumalan iti border control points ti Probinsya ket maipasidong iti minimum clinical wenno health assessment ken dagiti mangipakita iti sintomas ti COVID-19 ket maipasidong a dagos iti testing, isolation, panakataming ken obserbasion.

Maipalagip nga itay laeng nabiit, impaulog ti lokal a gobyerno ti La Union iti “No Negative Result No pass policy” kadagiti mannalon a mangibiyahe kadagiti produktoda a nateng sadiay Metro Manila a nangitunda iti panakaklaat dagiti maseknan nangruna ditoy lokalidad a pakatataudan dagiti nateng a maiturong iti a sabali a lugar

Immuna metten nga inwaragawag ti nasyonal a gobyerno a saan a rumbeng a maitantan ti panakaibiyahe ken panakailako dagiti food items kabayatan ti pandenya kas ti nateng tapnu saan a madadael dagitoy.