photo | Kabayan Fire Station

BAGUIO CITY – Nasurok iti P1.7-M ti gatad dagiti babassit a kayo a nauram ken nadadael iti napasamak a walo nga aldaw a forest fire sadiay Kabayan, Benguet.

Maibasar iti damage assessment report ti DENR-Cordillera, nangrugi ti uram iti dua a sitio sadiay Barangay Adaoay no sadino a pagar-araban dagiti taraken a baka ken pakasarakan kadagiti kaingin.

Nailanad iti report a kaaduan kadagiti nauram a paset ti bambantay iti tallo a barangay ti Kabayan ket grassland wenno karuruutan ken pine forest wenno ayan dagiti kayo a saleng.

-- Advertisement --

Nailanad pay iti report a dagiti nauram a kaykayo ket saksakupen dagiti established forest plantations iti sidong ti Expanded National Greening Program ken natural pine forest.

Naamuan nga addaan kalawa a nasurtok 643 nga ektarya dagiti nauram a bantay sadiay Kabayan a nakadadaelan ti dumanon 166,000 a babassit a kayo, partikular ti pine trees.