BAGUIO CITY – Nagawiden ditoy Pilipinas ti nasurok 300 a Pinoy manipud Ethiopia idi napalabas a bulan gapu iti epekto ti COVID 19 pandemic.

Iti interbyu ti Bombo Radyo kenni Elijah Destacamento, international teacher ken presidente ti Filipino Community sadiay Ethiopia, kinunana a naipasidong dagiti nasao nga OFWs iti repatriation babaen iti Philippine Embassy sadiay Egypt.

-- Advertisement --

Inlawlawagna a dagiti nagawid a Pinoy ket nagtrabaho iti railway company nga ayan ti adu a trabahador.

Kinunana a naisardeng ti operasyon ti kompania gapu iti amak nga apaman a makaptan iti COVID 19 ti uray maysa laeng nga empleado ket makaaran ti kakadwa dagitoy nangruna ta agnanaed dagitoy iti maymaysa a lugar.

Sigun kenni Destacamento, iti baet a napaawid dagiti nasao a Pinoy ket awan pay ti OFW sadiay Ethiopia a nakaptan iti COVID 19.

Kinunana a nasayaat ti kasasaad dagitoy nangruna ta aktibo ti Filipino community sadiay a mangmonmonitor iti kasasasad dagiti OFWs iti tunggal rehion ti Ethiopia.

[Elijah Destacamento, international teacher ken presidente ti Filipino Community sadiay Ethiopia]

Dinakamatna pay nga aktibo ti Philippine Embassy sadiay Egypt a tumultulong kadagiti OFWs sadiay Ethiopia.

Maibasar iti report, kaaduan kadagiti OFWs sadiay Ethiopia ket professionals nga agtatrabaho kas mannursuro, engineers ken dadduma pay.

Iti agdama, nakairekord ti Ethiopia iti nasurok 160 a positibo a kaso ti COVID 19, nasurok 90 dagiti naimbagan ken uppat dagiti pimmusay.