BAGUIO CITY – Irekreklamo dagiti maseknan nga umili sadiay Binga, Tinongdan, Itogon ti nangato unay a plete dagitoy a dimmanon iti P200 tunggal round trip.

Maibasar iti reklamo a naawat ti Bombo Radyo Baguio, sakbay ti pandemya ket P50 ti plete ti Binga agingga Baguio ken innaldaw ti biahe.

-- Advertisement --

Nupay kasta, idi nangrugi ti pandemya ket agbaybayadan ti P200 iti round trip a kaipapananna a P100 iti Binga agingga Baguio a biahe ken P100 iti Baguio agingga Binga a biahe ken nagbalin a Martes, Huwebes ken Sabado ti biahe.

Impettengda a maawatanda nga idi rugi ti pandemya ket kasapulan a maipangato ti plete gaputa adda ti pagkasapulan iti social distancing a nangapektar iti kapasidad ti mailugan.

Kinunada nga ita ket adda metten dagiti platic barriers iti uneg dagiti lugan ken arigna masubsublida ti kapasidad ti mailugan ken nagsubli manen nga innaldaw ti biahe.

Gapu iti daytoy, iyap-apelada ti panakaisubli ti sigud a plete dagitoy a P50 wenno saan ket manayonan iti bassit ti P50 para iti maintenance dagiti lugan nangruna ta naisina met ti plete dagiti bagahe dagiti pasahero.

Impeksada met a mabutengda nga agaramid iti formal complaint gaputa dagitoy ti makaawat ti pammabalaw gaputa aga-ammo dagiti tattao sadiay.

Taripnongen ti kapitan ti Tinongdan, Itogon, Benguet dagiti residente ti Binga ken dagiti drivers/operators sadiay tapnu risutenda ti isyu iti nangato a plete a masingsingir kadagiti umili sadiay.

Iti interview ti Bombo Radyo Baguio, kinuna ni Punong Barangay Edwin Atumpag a babaen iti taripnong ket maala ti kapanunutan dagiti umili ken dagiti drivers ken marisut ti reklamo a nangato a plete iti Baguio-Binga a biahe.

Dinakamatna metlaeng nga impaayab ken pinagpalawagna dagiti operator dagiti jeep sadiay Binga ken naamuanna kadagitoy nga ‘internal arrangement’ ti basaranda iti panagsingirda iti P200 a plete iti round trip.

Imbilinna met kadagiti agrekreklamo nga umili ti panagaramid dagitoy iti formal complaint tapnu adda ti pagbasaranna iti aramidenna a surat iti maseknan nga ahensia kas iti Land Transportation Franchising and Regulatory Board (LTFRB).

Nupay kasta, awan paylaeng ti naaw-awat ni Kapitan Atumpag a kopya ti pormal a reklamo dagiti residente ti Binga.

(ni Barangay Edwin Atumpag ti Tinongdan, Itogon, Benguet)

Inkalintegan ti sumagmamano a drivers dagiti jeep nga agbibiahe iti Binga-Baguio ti panagsingirda iti P200 para iti round trip.

Iti panakiyuman ti Bombo Radyo Baguio, kinunada a daytoy ket gaputa isu ti naibilin a singirenda a plete.

Inyapelada metlaeng ti panag-anos ken panaka-awat dagiti ilugluganda a pasahero gapu iti agdama a limitasyon nga intunda ti pandemya.

Innayonda nga adda metlaeng ti baybayadanda a P230 iti agdama a paradaan dagitoy.

Dinakamat pay dagitoy a no mamingsan ket bassit ti pasahero a maisang-at dagitoy.

(timek dagiti maseknan a jeepney drivers ti Binga)

Sigun pay kadakuada, umdas laeng ti mapaspastrekanda para iti panakamintinir ti luganda ken iti paggatangda iti pagkasapulan iti pagtaengan dagitoy.

Naamuan a tallo a jeep ti agbibiahe iti Baguio-Binga a ruta ken mamingsan laeng dagitoy nga agbiahe iti maysa nga aldaw.