-- ADVERTISEMENT --

BAGUIO CITY – Impanamnama ti PhilHealth-Cordillera a pappartakenda ita ti panakaiproseso dagiti claims ti Benguet General Hospital (BeGH) kasaruno ti panakanayon ti empleyado dagitoy a tumulong iti panakaiproseso dagiti kasapulan a dokumento.

Sigun kenni Dr. Dominga Gadgad, Acting Regional Vice-President ti PhilHealth-Cordillera, dumanon iti nasurok 17,000 a claims ti naawatda manipud iti BeGH nangrugi idi Enero agingga iti agdama a bulan ti Oktobre.

Kinunana a manipud iti nasao a bilang ket nasurok 8,00 a claims nga aggatad ti P79-M ti nabayadan ti PhilHealth.

Inlawlawagna a tunggal COVID patient a maikategorya iti mild case ket bayadan ti PhilHealth iti P44,000 bayat a ti critical case ket mabayadan ti P770,000.

Inlawlawag pay ni Gadgad a maladladaw ti panangiprosesoda kadagiti claims gaputa agdependar metlaeng daytoy iti panagtungpal ti maysa a pagagasan iti umno a proseso ken iti panangisumitirda iti amin a kasapulan a dokumento.

-- ADVERTISEMENT --

Inyunay-unayna a napartak met ti panakaiproseso dagiti nasao a claims la ketdi awan ti tumaod a lapped.

Naamuan pay nga itay laeng nabiit ket 20 nga interns manipud iti Government Internship Program ti naidestino iti opisina ti PhilHealth-Cordillera a tumulong iti panakaiproseso dagiti claims ken iti panagsukimat no kompleto dokumento nga isumsumitir dagiti health facilities iti rehion para iti panakabayad ti claims dagitoy.