BAGUIO CITY – Mapattapatta a 50 agingga 70 nga indibidual a kayatna ti sumrek ditoy Baguio ti saan a mapalpalabusan a makalsut kadagiti borders ti siudad kas resulta ti naing-inget nga implementasyon ti border protocols.

Sigun kenni Mayor Benjamin Magalong, kadawyan a rason iti saan a panakaipalubos ti iseserrek ditoy siudad dagiti nasao nga indibidual ket ti kinakurang ti dokumento ken saan nga essential travel ti panggep dagitoy.

-- Advertisement --

Maibasar iti datus manipud August 1-21 ti agdama a tawen, pakabuklan a 377 nga indibidual ti napasubli iti nagtaudanda a lugar gapu iti kinakurang ti travel requirements dagitoy.

Agtaltalinaed met a 14 dagiti natiliw gapu iti panangiparangda kadagiti peke a dokumento.

Maipalagip a nairtengan ti panagbantay ken panagsukimat dagiti pulis kadagiti dokumento dagiti lumablabas kadagiti border checkpoints ti siudad idi pay Hulyo tapnu maaksionan dagiti timmaud a parikut iti drop-and-go ken passing-through travels.

Naaramid pay ti panagirteng kas addang tapnu malapdan ti iseserrek ditoy siudad dagiti napegpeggad a variant ti COVID-19 kas iti Delta variant.

Kiniddaw pay ni Mayor Magalong ti agtultuloy a panagridam dagiti personnel a mangimatmaton kadagiti checkpoints ken triage areas ti siudad iti panagsukimat kadagiti travel documents, pakairamanan dagiti vaccination cars dagiti sumsumrek ditoy Baguio.