-- ADVERTISEMENT --
photo | Cordillera PNP

BAGUIO CITY – Nadiskobre ti nagtipon a pwersa ti pulisya ken militar ti maysa a pagiduldulinan iti armas ti komunista a New People’s Army (NPA) sadiay Batayan, Alangtin, Tubo, Abra idi kanikadua.

Maibasar iti report, nangisayangkat ti 71st Infantry Battalion, 69th Infantry Battalion ken 73rd Military Intelligence Company ti Philippine Army ken Abra Police Provincial Office ti intelligence operation kalpasan nga intudo dagiti sigud a rebelde nga NPA ti nakaidulinan dagiti armas.

Nakumpiskar iti nasao a pagiduldulinan ti uppat a nagduduma a klase ti riple, maysa a shotgun, maysa a caliber 38 revolver ken 15 a nagduduma a klase ti bala.

Naipaima iti Advanced Command Post ti 71st Infantry Battalion dagiti nakumpiskar nga armas para iti dokumentasyon ken panagidulin.

Kinuna dagiti otoridad a ti balligi nga operasyon ket bunga ti naingetan a Community Support Program ti militar ken pulisya ken iti kooperasyon dagiti surrenderees a nangitudo iti lokasyon dagiti nakumpiskar nga armas.

-- ADVERTISEMENT --