BAGUIO CITY – Nadiskobre dagiti pulis ken militar ti maysa a pagilemlemmengan dagiti rebelde a grupo iti armas dagitoy sadiay Bagumbong, Calafug, Conner, Apayao.

Maibasar iti impormasyon, dagus a nangisayangkat iti panagkumpirmar ti tropa ti gobyerno kalpasan a nakaawatda iti impormasyon manipud iti maseknan nga umili mainaig iti kaadda dagiti armas a naidulin iti maysa a gukayab nga imbati dagiti mapapati a kameng ti rebelde a New People’s Army iti sidong ti Kilusang Larangang Gerilya Baggas – Marcial Daggay Command.

-- Advertisement --

Nadiskobre iti nasao a disso ti maysa a sako a naglaong ti dua a US Carbine Caliber 30 M2; 13 a bala ti 203; walo a basyo ti bala ti M203; dua a bandolier ti Garand; maysa a bandolier ti M203; walo a cartridge clip para iti Garand; 29 a bala ti carbine; maysa a magazine ti carbine; 155 a bala ti Garand; 45 a bala ti M14; tallo a riffle grenade; tallo a riffle grenade case; maysa nga 81mm mortar; maysa a smoke grenade; 14 a bala ti 9mm; maysa a balay ti bala ti 9mm; maysa a bassit a karton ti nagduduma a paset ti paltog.

Iti agdama, naipaima dagitoy iti kustodiya ti Apayao Provincial Crime Laboratory ken iti Apayao Provincial EOD/Canine Unit para iti umno a disposisyon.