-- ADVERTISEMENT --
photo | 5th ID, PA

BAGUIO CITY – Kumapkapoyen ti pwersa dagiti rebelde a New People’s Army (NPA) kagiddan ti panagsuko iti gobyerno ti adu a miembro ken mangsupsuportar iti grupo malaksid pay nga immilet ti paggargarawan dagitoy.

Impannakkel daytoy ni Major Jekyll Julian Dulawan, panakangiwat ti 5th Infantry Division ti Philippine Army iti interview ti Bombo Radyo Baguio.

Sigun kenkuana, napintas ti 2020 para iti 5th Infantry Division (ID) a mangsaksakop iti Cordillera Region ken Cagayan Valley gaputa adu dagiti naaramid dagitoy iti kampanya kontra iti insurhensia wenno panagrebelde, kabinnadang dagiti pulis ken dagiti nagduduma nga ahensia ti gobyerno.

Kinunana a kapintasan iti accomplishment dagitoy ket ti panakaparmek ti uppat a guerrilla fronts ti NPA iti Cordillera Region ken Cagayan Valley, partikular dagiti Komiteng Larangang Guerilla iti Ifugao; iti Quirino, Nueva Vizcaya; ken iti southern ken central front committees iti Isabela.

Impannakkelna pay nga iti rekord ti 5th ID ket 117 a regular members ti NPA ti simmuko iti tropa ti gobyerno malaksid pay iti 76 a Militia ng Bayan ken 18 a mangsupsuportar kadagiti rebelde.

-- ADVERTISEMENT --

Naisuko dagitoy ti 57 a nagduduma nga armas ken 23 a pampabettak bayat nakumpiskar ti 46 nga armas nga inlemmeng dagiti rebelde babaen iti panangitudo dagiti rebel surrenderees.

Nadiskobre ken nalacub pay ti 14 a kampo dagiti rebelde kadagiti kabambantayan bayat a nakakemmegda iti innem a rebelde nupay adda ti dua a bangkay ti rebelde a narekober dagitoy kadagiti napasamak nga engkwento iti nagbaetan ti tropa ti gobyerno ken dagiti rebelde iti Cagayan ken Cordillera.