-- ADVERTISEMENT --

BAGUIO CITY – Nakumpiskar ti nagduduma a paltog ken bala iti naggigiddan a panagrebbek dagiti otoridad iti pagtaengan ti maysa a konsehal sadiay Narnara, Pilar, Abra ken kadagiti pagtaengan ti dua a kasinsinna idi kalman, October 18, 2021.

Nabigbig dagiti tallo a da Pilar Councilor George Sotelo, Ferdinand dela Rosa ken Paterno Sotelo.

Nakumpiskar manipud iti pagtaengan ni Councilor Sotelo ti maysa a caliber M16A1 baby armalite rifle, 192 a bala, maysa a caliber 45, maysa nga M1911 pistol, maysa a caliber 9MM pistol ken 12 a nagduduma a magazines ti bala.

Nakumpiskar met iti pagtaengan ni Ferdinand dela Rosa nga empleyado ti municipal government ti Pilar ti maysa a caliber 5.56mm rifle, maysa a caliber 5.56mm assault rifle, 71 a bala ken tallo a magazines ti bala.

Nakumpiskar pay ti maysa a caliber 45 pistol nga addaan ti magazine ti bala iti pataengan ni Paterno Sotelo.

-- ADVERTISEMENT --

Naisayangkat ti panagrebbek iti agkakaabay a pagtaengan dagiti agkakasinsin kas maitunos iti pammilin nga impaulog ni Baguio City Regional Trial Court Branch 5 Judge Maria Ligaya Itliong-Rivera.

Naiturong iti kustodiya ti pulisya ti konsehal ken dagiti dua a kasinsinna para iti panangsungbatda iti kaso a maipila kontra kadagitoy.