BAGUIO CITY – Nadiskobre ti militar ti nagduduma a kagawaan nga inabandona dagiti miembro ti Communist Party of the Philippines-New People’s Army (CPP-NPA) iti paset ti bantay iti nagbeddengan ti Tetep-an Norte, Sagada ken Dalican, Bontoc sadiay Mountain Province idi kanikadua.

Maibasar iti report ti militar, nasarakan ti nakaidulinan dagiti nasao a kagawaan ti rebelde a grupo babaen iti impormasyon nga imbinglay dagiti sigud a miembro ti CPP-NPA ken iti panakitinnulong dagiti maseknan nga umili.

-- Advertisement --

Karaman kadagiti nadiskobre ti nagduduma a paset ti paltog ken improvised a bandolier, kagawaan nga addaan ti marka a ‘Front Operational Command – Alfredo Ceasar Junior Command’ a paset ti Komiteng Larangang Gerilya-Southern Ilocos Sur ken badbado nga addaan ti nakasurat a ChadliMolintas Command ti NPA Ilocos-Cordillera.

Nadiskobre pay ti dua a libro a naglaon ti leksion iti revolutionary warfare, dua nga alambre nga addaan kaatiddog a sag-25 a metro, tallo nga indayon ken sumagmamano nga ules, trapal, radyo, power bank, flashlight ken extension cord; lima a bag pack ken kagawaan a pang-medikal.

Kinuna dagitoy nga addan ti maysa agingga dua a bulan a napalabas idi inabandona dagiti rebelde dagiti kagawaan dagitoy iti nasao a disso kalpasan a pimmanaw iti grupo ti kaaduan kadagiti miembro ti grupo.

Dinakamat pay dagiti sigud a rebelde nga agtultuloy ti panagkapoy ti pwersa ti CPP-NPA gapu iti panangtalikod kadagitoy dagiti umili ti Ilocos Region ken Mountain Province a sigud a mangsupsuportar iti grupo malaksid pay iti panakaideklara ti CPP-NPA kas persona-non-grata kadagiti nasao a probinsia.