BAGUIO CITY – Nagpalawag ti project engineer iti manarimaan a patrabaho iti deppaar ti Naguilian Road wenno Quirino Highway seknan iti panakababalaw ken sumagmamano a reklamo iti nasao a patrabaho.

Iti interview ti Bombo Radyo Baguio, inlawlawag ni Engr. Irene Zita Dela Cruz a napartak met ti kontraktor ti proyekto ken iti agdama ket 30% a nakompleto daytoy.

Sigun kenkuana, bumunbuntog ti patrabaho gapu kadagiti obstructions iti masakupan ti proyekto kas kadagiti linya dagiti telecommunications companies ken dagiti aktibo a linya ti kuryente.

-- Advertisement --

Dinakamatna a gapu kadagitoy ket nailet ti working area ken saan a makatrabaho a naimbag ti kontraktor.

Kinunana a pumartak laeng ti patrabaho no maisimpa dagiti kable ken maiyakar dagiti linya ti kuryente.

Linawlawagan pay ni Engr. Dela Cruz a saan a maikkat dagiti pasdek nga apektado iti patrabaho nangruna no adda ti titulo dagitoy gaputa adda ti kasapulan a proseso no titled property ti maapektaran iti patrabaho.

Inyunay-unayna a ti laeng saksakupen ti patrabaho ket ti sakop ti road right-of-way ti kalsada.

Naituding a malpas ti proyekto inton May 6, 2021 a naponduan iti agarup P40.6-M ken narugian idi November 23, 2020 nupay ti panakarakrak dagiti pasdek nga apektado iti patrabaho ket idi pay February 2020.

(ni Engr. Irene Zita Dela Cruz, project engineer ti patrabaho iti deppaar ti Naguilian Road, Baguio City)

Kabayatanna, binabalaw dagiti maseknan a residente ti Purok 1, MRR Queen of Peace Barangay ti killaat a panakaibilin ti panangpanawda kadagiti babbalayda nga apektado iti nasao a patrabaho iti deppaar ti Naguilian Road.

Iti interview ti Bombo Radyo Baguio kenni MRR Queen of Peace Barangay Kagawad Catherine Quinones, emosyonal nga imbinglayna ti pakaseknanda iti nasao a pammilin.

Impettengna a sakbay kuma ti panakapapanawda ket naipaayanda iti umdas a panawen tapnu nakabirukda iti pagakaranda nupay inaklonna a posible a marigatanda metlaeng gapu iti kinakurang ti pinansial.

Sigun kenkuana, idi met immuna a naipaulog ti demolition order iti masakupan ti barangayda idi Pebrero 2020 ket dagitoy a mismo ti nangrakrak kadagiti babbalayda a saksakupen ti road right-of-way.

Innayonna, awan metlaeng ti pagalaanda iti pangbayadda iti pagakaranda nangruna ta naapektaran ti pagbiaganda idi narakrak dagiti paset ti balayda a paglaklakuanda.

(ni MRR Queen of Peace Barangay Kagawad Catherine Quinones)

Inyunay-unayna met a maawatanda a para iti kinatalgedda ti panakaibilin ti panangpanawda pay iti babbalayda ngem naladawen ken saan a nalaka ti agakar.

Kinuna ti kagawad nga idi naplano ti road widening ti Naguilian Road ket nasken nga adda met kuma ti kakuyog daytoy a plano para kadagiti maapektaran a pamilya.

Saan pay a naliklikan a binabalawna ti panakabaybay-an ti patrabaho iti agarup makatawen no sadino, naisayangkat ti panagwakwak wenno demolisyon kadagiti masakupan ti road right-of-way ti Naguilian Road idi Pebrero 2020.

Gapu iti daytoy, kinuna ni Kag. Quinones nga apaman a maawatda ti notice para iti panangbakanteda iti balayda ket dagus daytoy nga agkamang kadagiti maseknan nga opisina.

(ni MRR Queen of Peace Barangay Kagawad Catherine Quinones)

Naamuan a dumanon iti 41 a pagtaengan a bukbuklen ti 157 nga indibidual sadiay Purok 1 ti MRR Queen of Peace ti naibilin a mangpanaw iti babbalayda gapu iti manarimaan a patrabaho sadiay ken addan ti final markings kadagiti babbalay a nasken a mabakantian.