BAGUIO CITY – Mairekreklamo ti nabangsit a drainage system sadiay Barangay Fairview ditoy siudad ti Baguio.
Segun iti maysa a residente sadiay, posible a napunno iti basura ti drainage wenno naikonektar sadiay ti dadduma a septic tank a mangituntunda iti kinabangsit daytoy.
Mainaig iti daytoy ket impetteng ni Punong Barangay Justina Andaya nga awan ti kooperasyon dagiti residente nga agirekreklamo iti nabangsit a drainage sadiay.
Impettengna a nabayagen a mairekreklamo ti nabangsit a drainage sadiay ngem gaputa awan ti makaitudo no sadino a paset ti pagtataudan iti nabangsit nga ayamu-um ket saanda daytoy a maaksyonan.
Kinunana a ti drainage sadiay ket dimmalan iti sirok dagiti babbalay isut gapuna a marigatanda a mangbirok iti daytoy.
Innayonna pay a mabalinda nga iprayoridad ti pondo para iti daytoy, la ketdi maamuanda no sadino a paset ti pagtataudan ti nabangsit nga ayamu-om.
