-- ADVERTISEMENT --

BAGUIO CITY – Naragpat ti Philippine Drug Enforcement Agency (PDEA) – Cordillera ti puntiryada a maaramid nga operasyon iti umuna a kagudua ti agdama a tawen.

Impannakkel daytoy ni PDEA-Cordillera regional director Gil Castro iti panakiuman ti Bombo Radyo Baguio kagiddan ti panangdakamatna a nagresulta daytoy iti dakkel a naaramidan ti ahensiada iti panakabigbig ti Cordillera kas maysa kadagiti katalgedan a rehion iti pagilian.

Sigun kenkuana, 108% a naragpatda ti targeted operations ti ahensia para iti first semester ti 2021, pakairamanan ti panakaideklara ti innem a barangay iti rehion a drug-free barangays ita a tawen.

Dinakamatna a naipasidongda metten iti validation ti 600 a barangay iti rehion nga immunan a naideklara a drug-cleared barangays ken 200 a barangay a nagtalinaed a drug-unaffected barangays.

(ni PDEA-Cordillera regional director Gil Castro)

Kinunana a 90% kadagiti non-index crimes iti rehion ket kaso mainaig iti iligal a droga ken 90% kadagitoy ket resulta ti operasyon ti PDEA-Cordillera.

-- ADVERTISEMENT --

Gapu iti daytoy, impannakkel ni Castro a kas maibasar iti pudpudno a datus ket naksayan ti suplay ti iligal a droga, adu dagiti natiliw a karaman iti illegal drug trade ken naaddaan ti barangay-drug clearing.

Iti baet daytoy, impasiguradona a saan a sumardeng ti panangisayangkatda iti kampanya kontra iti iligal a droga.