-- ADVERTISEMENT --

BAGUIO CITY – Imbilin ni Apayao Gov. Eleanor Bulut-Begtang ti panakaipasidong iti Enhanced Community Quarantine (ECQ) ti munisipyo ti Pudtol kasaruno ti naduktalan a kaso ti delta variant sadiay idi Agosto 6, 2021.

Nailanad iti executive order nga impaulog ni Governor Begtang ti temporaryo a pannakaipasidong ti Pudtol iti ECQ agingga intun Agosto 21 ti agdama a tawen kas proteksion kadagiti umili sadiay iti posible a panagwaras ti delta variant iti nasao nga munisipyo ken ti probinsia.

Babaen iti daytoy ket maaddaan iti gundaway ti Provincial Inter-Agency Task Force ken Municipal Inter-Agency task Force partikular iti sektor ti salun-at a mangbukel kadagiti addang kas iti agresibo nga contact tracing ken mass testing kadagiti nabigbig ken posible nga close contacts ti nabigbig a kaso ti delta variant sadiay.

Kabayatan ti implementasyon ti ECQ, maipatungpal met ti nairtengan nga pagalagadan a pakairamanan ti limitado nga pannagaraw ken transportasyon dagiti umili, nairtengan nga regulasyon iti operasyon dagiti industriya, pammalubos iti food ken essential services, nairtengan pay a presensia dagiti uniformed personnel a mangipatungpal iti community quarantine protocols.

Impasigurado met to Gobernador ti pannakaipaayda iti relief goods kadagiti apektado a pamila ken indibidual kalpasan a makiyuman ti probinsial a gobierno iti Regional IATF ken ti DSWD ken OCD regional offfices.

-- ADVERTISEMENT --

Umap-apela pay daytoy kadagiti umili ti Apayao partikular dagiti residente sadiay Pudtol tapnu nainget nga obserbaranda ti community quarantine measures ken agannada kontra iti panagwaras ti COVID-19 ken ti napeggad nga delta variant iti probinsia.