BAGUIO CITY – Pagsagsaganaan ti lokal a gobyerno ken ti mangimatmaton iti Mount Pulag National Park a masarakan sadiay Kabayan, Benguet ti umadanin a panakailukat ti nalatak a bantay.

Sigun kenni Park Superintendent Emerita Albas, maipimpinalen dagiti polisiya ken pagalagadan nga ipaulog dagitoy kagiddan ti panakapalukay ti quarantine status iti probinsya ti Benguet.

-- Advertisement --

Kinunana nga iti agdama ket addan dagiti inisyal a polisiya a nasken a suruten dagiti umili manipud iti Baguio ken Benguet a kayat ti agpasyar iti Mount Pulag kas iti panakalimitar ti bilang dagiti mapalubosan a bisita a sumang-at iti bantay tapno masurot latta ti 50% capacity kas maitunos iti paglintegan ti nasional a gobierno.

Dinakamatna a malimitaran metlaeng ti oras ti panagtalinaed dagiti turista iti summit wenno tuktok ti Mount Pulag.

Napagnumuanda a saan paylaeng a maipalubos ti panagcheck-in dagiti bisita kadagiti balay-pagdagusan sadiay Kabayan ngem ketdi mairekomendar ti panag-camping dagitoy kadagiti naituding a camping site sadiay.

Sigun pay kenni Albas, ipangrunada dagiti indibidual a nakapagreserba idi napalabas a tawen.

(ni Park Superintendent Emerita Albas ti Mount Pulag National Park)

Dakkel metlaeng ti posibilidad nga ikalikagumda kadagiti turista ti negatibo nga antigen wenno RT-PCR test result sakbay makapasyarda iti nasao a bantay.

Inlawlawagna a ti maipaulog a pammilin ket para iti seguridad dagiti dagiti bisita ken dagiti tour guides iti Mount Pulag.

Naituding nga agtaripnong ti opisina ti Mount Pulag National Park tapnu maipinal ti maipaulog a polisiya ken tapno maamwan ti eksakto a petsa ti panakailukat ti nasao a bantay para kadagiti turista. (-report ni Bombo Janice Juanito)