BAGUIO CITY – Sumangsango iti dua a kaso ti maysa a driver kalpasan a pimmusay ti motorcycle rider a naatalan ti imanmanehona nga oil tanker, rabii idi Sabado, July 18, 2021 iti deppaar ti Naguilian Road, siudad ti Baguio.

Nabigbig ti driver a ni Marvex Reyes, 52-anyos, tubo ti Tibag, Tarlac City bayat a nabigbig ti biktima a ni Jne Klyne Bedking, 32-anyos, residente ti Ucab, Itogon, Benguet.

-- Advertisement --

Naduktalan iti imbestigasyon ti pulisya a nag-overtake ti biktima iti kannawan ti oil tanker nga imanmaneho ni Reyes.

Nupay kasta, gapu iti napigsa a panagbayakabak ti tudo ket naigalis ti pilid ti motorsiklo ti biktima aginggana a naipasirok daytoy iti oil tanker ken sadiay a naatalan.

Naitaray pay ti biktima iti pagagasan ngem pimmusay kabayatan ti panakatamingna.

Naiturong met ti driver ti oil tanker iti istasyon ti pulisya.

Gapu iti insidente, sumango ni Reyes kadagiti kaso a homicide ken reckless imprudence resulting in damage to property.