-- ADVERTISEMENT --

BAGUIO CITY – Sumangsangon iti kaso a panaglabsing iti RA 9165 wenno iti Comprehensive Dangerous Drugs Act of 2002 ti maysa kadagiti Regional Top Ten Illegal Drug Personality iti Cordillera kalpasan a natiliw iti buy-bust operation sadiay Lower Magsaysay Avenue, Happy Homes, Baguio City idi kalman, September 6, 2021.

Nabigbig daytoy a ni Troy John Cabatu, 21-anyos, tubo ti Narvacan, Ilocos Sur ken residente ti Piripin Bato, Pico, La Trinidad, Benguet.

Inlakona iti nakatransaksionna nga operatiba ti maysa a pakete ti mapapati a shabu nga agdagsen ti 2.5 grams.

Nakumpiskar metlaeng iti belt bag daytoy ti dua a pakete ti mapapati a shabu nga agdagsen ti 5.3 grams ken maysa a pakete a naglaon ti mapapati a napagango a bulbulong ti marijuana.

Aggatad amin dagitoy ti P53,500.

-- ADVERTISEMENT --

Nakumpiskar pay kenni Cabatu ti nagduduma a drug paraphernalia ken motorsiklo a naaramat iti transaksyon bayat a narekober kenkuana ti naaramat a buy-bust money.

Kinuna dagiti otoridad a nabayagen a binambantayanda ni Cabatu gapu iti maatap a panagbalin daytoy a supplier ti shabu sadiay Quirino Hill, Pinget ken La Trinidad, Benguet.

Naamuan pay a ni Cabatu ket maibilbilang a high value individual iti iligal a droga ken maysa a drug surenderee ti Baguio City Police Office-Station 2 idi 2017.