BAGUIO CITY – Nakemmeg sadiay probinsia ti Ifugao ti maysa kadagiti maibilbilang a Top Most Wanted Person ti pagilian kalpasan ti 29 a tawen a panaglemmengna iti ima ti linteg.

Nabigbig daytoy a ni James Bunay Humiwat, 53-anyos, tubo ti Boliwong, Lagawe, Ifugao ken nailista kas Top Most Wanted Person iti regional level nga addaan patong iti ulo a P140,000.

Nakemmeg daytoy sadiay Bakkugan, Pullan, Lagawe, Ifugao babaen iti bileg ti warrant of arrest nga inserbi dagiti operatiba ti Lagawe Municipal Police Station.

-- Advertisement --

Sumangsango ni Humiwat iti kaso a multiple frustrated murder nga awanan ti piansa ken attempted murder with assault against an agent of person in authority nga addaan ti piansa a P30,000.

Maibasar iti rekord, inaramid ni Humiwat ti umuna a krimenna idi malem ti January 11, 1992 no sadino, impurwakna ti maysa a granada iti uneg ti maysa a pagtagilakuan sadiay Poblacion South, Lagawe, Ifugao a nakadangran ti innem nga indibidual.

Napasamak ti maikadua a kasona idi April 13, 2000 sadiay Nayon, Lamut, Ifugao no sadino, ditoy a naakusaran daytoy iti krimen a gandat a panangpapatay iti agent of person in authority.

Dinayaw met ni PCol. David Mariano, dadaulo ti Ifugao Police Provincial Office dagiti operatiba ti pulisya ken dagiti mismo umili a nangipaay ti impormasyon para iti panakakemmeg ti maan-anop a suspek.

Inkarina pay nga ituloyda a mangaramid iti mandatoda, saan laeng a ti mangkemmeg kadagiti wanted a tattao ngem ketdi, para iti panakaragpat ti nakapkappia ken nataltalged nga Ifugao.