photo | Baguio City PIO

BAGUIO CITY – Nagleppasen ti makabulan a selebrasyon ti Urban Farmers and Fisherfolk’s Month nga addaan ti tema a “May Pandemya man o wala, Magsasaka’t Mangingisda, Maasahan ng Bansa”.

Tampok iti culminating program ti panakabigbig dagiti Outstanding Farmers and Farmer Organizations ken ti workshop iti panakabukel ti feasible Community-Led Agri-Tourism Site a dinar-ayan ti nagduduma nga organisasyon dagiti mannalon.

-- Advertisement --

Binigbig met ni City Veterinary and Agriculture Office (CVAO) head Dr. Brigit Piok ti kooperasyon ken suporta ti amin iti panagballigi dagiti aktibidad ti selebrasyon.

Pinagyamananna met ni Mayor Benjamin Magalong gapu iti inisyatibo daytoy iti panakabiruk ti agarup nasurok P20-M a pondo para iti panakapadur-as ti urban agriculture ti siudad.

Kiniddawna met ti agtultuloy a suporta ti lokal a gobyerno iti panakairaman dagiti agtutubo iti sektor ti agrikultura.

Inyunay-unay met ni Marlene De Castro, ti nangibagi kenni Mayor Magalong iti nasao a selebrasyon ti kinapateg ti kooperasyon ken network iti panakarisut dagiti karit a sangsangwen dagiti mannalon.

Kinunana a nasken nga agtalek dagitoy iti ar-aramidenda ken agkaykaysada tapnu mapataudda ti suplay a kasapulan ti market wenno ti publiko.

Imbalakadna pay ti panangituloy dagiti mannalon iti siudad a mangpataud kadagiti flowering plants tapnu masuportaran ti industriya ti lokal a turismo ken mamintinir ti Baguio kas “Flower City of the North”.

Dinakamatna a supsuportaran ti mayor dagiti inisyatibo para kadagiti babassit a mannalon iti lokalidad tapnu agbalin dagitoy a commercially competitive.

Napadayawan met dagiti mannalon ken organisasyon dagiti mannalon nga addaan ti outstanding ken replicable accomplishments.

Outstanding Young Farmers:

  1. John Shaley, Jr. (Happy Hallow)
  2. Ryan Palunan (Happy Hallow)

Outstanding Farmers (Senior Category):

  1. Amelia Montes (Pinget)
  2. Jane Pauline Abanag (Lucnab)

Outstanding Farmer Leaders:

  1. Margareta Joseph (Lucnab)
  2. Rocklyn Yadis (Irisan)

Outstanding Farmer Organizations:

  1. Barangay Lucnab Agriculture and Fisheries Association
  2. Granjeros De Oeste Organizacion, Inc.