BAGUIO CITY – Temporaryo a nasuspindir ti limitado a face-to-face classes ti sumagmamano a pagadalan iti rehion Cordillera nga immunan a napalubusan a mangisayangkat iti daytoy.

Sigun kenni Dr. Demetrio Anduyan Jr., dadaulo ti Commission on Higher Education-Cordillera, gapu daytoy iti panagngato manen ti kaso ti COVID-19 iti rehiyon Cordillera.

Kinunana nga adda ti lima a pagadalan ti nagsurat kadakuada para iti saan dagitoy a panangituloy ita a bulan ti Setyembre iti narugianen a limitado a face-to-face classes dagitoy.

Dinakamatna a dagiti nasao a pagadalan ket ti Saint Louis University, University of Baguio, Benguet State University, BVS Colleges ken ti Baguio Central University.

(ni CHED-Cordillera regional director Dr. Demetrio Anduyan Jr.)

Innayonna a nangrugin ti panakasuspindir ti limitado a face-to-face classes dagitoy idi napalabas a lawas kas panagridamda kontra iti COVID-19 iti baet a siento porsiento a nabakunaan dagiti mannursuro ken estudyante dagitoy kontra iti nasao a sakit.

-- Advertisement --

Sigun pay kenkuana, awan paylaeng ti naituding nga aldaw iti panagsubli ti limitado a face-to-face classes dagiti lima a pagadalan gaputa agdependar daytoy iti agbalin a sitwasyon ti lokalidad.

Maipalagip a 12 a pagadalan iti Cordillera ti napalubusan a mangisayangkat ti limitado a face-to-face classes iti health-related courses.