BAGUIO CITY – Sumangsango ita ti Baguio Water District (BWD) iti krisis iti pinansial kagiddan ti mapaspasaranda a karit iti panakasustinir ti operasionda a mangsuplay iti danum kadagiti konsumers ti siudad.

Iti eksklusibo a panakiyuman ti Bombo Radyo Baguio, inaklon ni BWD General Manager Engr. Salvador Royeca a saanda a nailaksid kadagiti naapektaran iti mapaspasaran a COVID19 pandemic.

-- Advertisement --

Kinunana a P5-M ti binulan a pukawda manipud napasaran ti krisis ditoy pagilian a nangitunda met iti panakaiparikep dagiti ado nga establishimiento ti negosyo ditoy lokalidad.

Gapu iti daytoy, impakaawatna nga agsingsingirda latta iti minimum a babayadan manipud kadagiti konsumers a saan a nakakonsumo iti danum ti BWD.

Innayonna a nakadependar ti panagsustinirda iti suplay ti danum kadagiti konsumer dagitoy isu’t gapuna a dakkel a tulong iti operasionda dagiti masingsingir a minimum manipud iti publiko.

Inlawlawagna met nga agsingirda latta iti aktwal a presyo iti tunggal lima a cubic meters a kinunsumo ti consumer.

Inaklonna pay a napilitanda a nangsuspendir iti capital expenditures ti BWD gaputta saandan a kabaelan ti mangsustinir iti operasion dagitoy.

Nupay kasta, awan ti planoda a mangipangato iti buis wenno babayadan iti danum ditoy siudad iti baet ti sangsangwen ti opisina a krisis iti pinansial.

ni Engr. Salvador Royeca, General Manager ti Baguio Water District

Malaksid iti daytoy, inaklon ni Engr. Royeca a marigatanda ita a mangibalanse iti pressure ti suplay ti danum iti intero a lokalidad.

Kinunana a naapektaran ti panagpatarayda iti water systems ti Baguio gaputta ado latta kadagiti taoda ti naka-quarantine gapu iti mapaspasaran a COVID-19 pandemic.

Daytoy ti makagapo a kiniddaw ti opisial ti panakaawat dagiti konsumer iti nangangato a paset a saan unay a masupsuplayan iti danum ken insingasingna ti panagpadeliver laengen dagitoy iti danum no kurang ti agtataud a suplay manipud iti BWD.

ni Engr. Salvador Royeca, General Manager ti Baguio Water District