BAGUIO CITY – Bimmaba iti 9% ti kontribusyon dagiti miembro ti Social Security System (SSS) a nakolektar ti Luzon North 1 Division idi napalabas a tawen 2020 no idilig iti nagbalin a koleksionda idi 2019.

Sigun kenni SSS Vice President for Northern Luzon 1 Division Ceasar Saludo, P2.4-B ti nakolektarda a kontribusyon dagiti SSS members idi napalabas a tawen no sadino adayo daytoy no idilig iti puntiryada a P2.6-B para iti 2020.

Inlawlawagna a ti panagbaba iti koleksion ti SSS ket intunda ti panagrikep dagiti kaaduan a negosyo ken panakaikkat iti trabaho dagiti empleyado gapu iti agdama a pandemya.

-- Advertisement --

Dinakamatna a bassit metlaeng ti bilang dagiti nagmiembro iti SSS idi napalabas a tawen a resulta paylaeng ti pandemya.

Imbinglay pay ni Saludo a gapu iti panagrikep dagiti adu nga establishimento ket adu met dagiti empleyado a nagaplikar iti unemployment benefit manipud iti SSS.

Sigun kenkuana, dagitoy dagiti empleado a naikkat iti trabaho gaputa saanen a masustinir ti employer-da ti sweldoda gapu iti panakalugi dagitoy gapu iti COVID-19 pandemic.