photo | Abra PLGU

BAGUIO CITY – Naikdeklaran ti kaunaan a Minahang Bayan sadiay Abra.

Masarakan daytoy sadiay Mapisla iti munisipyo ti Licuan-Baay nga inaplikaran ti Ag-agit Small-Scale Miners and Mining Cooperative Incorporated.

-- Advertisement --

Naideklara ti nasao a disso kas Minahang Bayan babaen iti Abra Provincial Mining Regulatory Board nga idadauloan ni Governor Joy Bernos ken ti Mines and Geosciences Bureau – Cordillera nga idadauloan ni Regional Director Fay Apil.

Sigun kenni RD Apil, nakompleton dagiti requirements ken napirmaanen ni DENR Undersecretary for Attached Agencies Rodolfo Garcia ti deklarasyon ti nasao a Minahang Bayan.

Naamuan nga adda pay innem nga aplikasion para iti Minahang Bayan manipud sadiay Boliney, Manabo ken Licuan-Baay.

Maipalagip nga idi September 25, 2018 ket impasardeng ni Gov. Bernos ti amin a kita ti panagminas sadiay Abra tapno maprebentaran ti panakadadael ti aglawlaw ken tapno maguyugoy dagiti small-scale mining operators nga agiproseso iti permitda.

Ipalpalubos ti Republic Act 7076 wenno ti People’s Small-Scale Mining Act of 1991 ti Minahang Bayan a wagas ti panagminas a saan a kasapulan nga agaramat ti pampabettak ken heavy mining equipment tapno maliklikan ti panakadadael ti aglawlaw.