screenshot from Korea Disease Control and Prevention Agency’s video

BAGUIO CITY – Kinumpirmar ti Korea Disease Control and Prevention Agency (KDCA) ti kaunaan a kaso ti South Korea iti maaw-awagan a breakthrough COVID-19 infection no sadino, agpospositibo manen iti COVID-19 ti maysa a fully vaccinated nga indibidual.

Iti report ni Bombo International Correspondent Ruel Toquero, maysa nga OFW sadiay Gimpo City, South Korea, naamuan a ti nasao nga indibidual ket adda iti 20’s a nagpositibo manen iti COVID-19 kalpasan ti 14 nga aldaw manipud naawatna ti maikadua a dose ti bakunana.

-- Advertisement --

Amken met ti KDCA a posible a manayonan ti nasao a kaso kadagiti masungad nga aldaw isut gapuna nga iyap-apelada kadagiti fully vaccinated individuals ti panagaramat latta dagitoy ti face mask kadagiti parapubliko a lugar.

Iti agdama, nasuroken iti 1.48 million nga indibidual sadiay South Korea wenno 2.9 percent iti pakabuklan a populasyonda a 54 million ti fully vaccinated.

Innayon pay ni Toquero nga idi kalman ket inaprobaran ti Ministry of Food and Drug Safety ti South Korea ti Moderna vaccine kas maikapat a brand ti vaccine a mabalin nga aramatenda sadiay.

Inwaragawag met ti gobyerno ti South Korea a mangisayangkatda ti mix-and-match trial kadagiti COVID-19 vaccines iti nagbaetan dagiti inaprobaranda a bakuna ken makipaset iti clinical trial ti dumanon 500 military personnel a nabakunaan iti first dose babaen iti AstraZeneca vaccine.

Iti agdama, nasuroken iti 134,000 ti pakakabuklan a kaso ti COVID-19 sadiay South Korea a nakatayan ti naurok 1,900 a kaaduanna ket 80-anyos nga agpangato.