BAGUIO CITY – Nasaknap latta nga agraraira ditoy lokalidad ti nagduduma a kita ti cybercrimes partikular ti online scams ken online lending.


Iti panakiyuman ti Bombo Radyo Baguio, imbinglay ni Pol/Lt Col Divina Mencio, Assistant Chief ti Crime Unit- Cordillera a nakailistada iti 21 a kaso ti online scams manipud Enero agingga Agosto ti agdama tawen.

-- Advertisement --


Kinunana a nupay bimmaba daytoy no idilig iti 73 a kaso a nairekordda iti kapada a panawen idi napalabas a tawen ket maikonkonsidera latta a makapaalarma nangruna ta ado ti nakapila a reklamo iti opisina dagitoy.


Dinakamatna a kadawyan a maaw-awatda a reklamo ket agtataud iti siudad ti Baguio ken Benguet gapu iti naparpartak a koneksion dagitoy kadagiti online transactions.


Inlawlawagna nga ado dagiti maal-allilaw nga online users gapu kadagiti makapaguyugoy a modus dagiti scammers kas iti panangidiayada iti investments, empleyo, discounts kadagiti magatgatang a kagawaan a mabayadan babaen iti online payment apps ken dadduma pay.


Innayonna a kalpasan nga maala dagiti scammers ti kasapulanda kadagiti biktimaenda ket kadawyan a butbutngenda babaen iti panangibutaktakda iti personal nga impormasion dagitoy.


Gapu iti daytoy, imbalakad ni Pol/Lt Col Mencio iti panagbalin a naridam ti publiko nangruna iti panakitransaksionda iti online ken dagus nga iyumanda kadagiti otoridad no makadlawda iti aniaman nga insidente ti scam tapno dagos a maaksionan ken maliklikan ti panakabiktimada manipud kadagiti managgundaway nga indibidual.