BAGUIO CITY – Maal-alarma ti City Health Services Office (CHSO) iti ngumatngato a kaso ti COVID-19 nga agtataud iti uneg ti pagtaengan.

Sigun kenni Mischelle Junio, Data Analyst ti Contact Tracing Team ti Baguio, kadawyan a transmission ti nasao a sakit ket iti laeng uneg ti balay kasaruno iti panakaobserbar dagitoy nga aminen a miembro ti pamilya ket agpospositibo COVID.

-- Advertisement --

Kagiddan iti daytoy, kinunana a dua ti kitkitaenda a point of transmission ti COVID-19 iti agdama partikular ti household ken workplaces.

Gapu iti daytoy, impalagip manen ni Junio iti umno a panagtungpal dagiti umili ti minimum public health standards uray kadagiti uneg ti pangtaengan tapno maliklikan ti transmission kadagitoy.

Ibalbalakadna pay ti panangisagana dagitoy ti bukodda a home isolation unit tapno adda ti aramaten dagitoy iti kanito a saandan a maakomodar kadagiti facilities nga imanmanehar ti siudad. (with Bombo Janice Denis)