BAGUIO CITY – Nailista ti kaso ti African Swine Fever (ASF) infection sadiay Danac, Boliney, Abra.

Naamuan nga idi kalman ket rimwar ti positibo a resulta iti ASF ti sample a naipatulod idi April 13, 2021 manipud munisipyo ti Boliney, no sadino, naala ti sample kalpasan nga inreport ti Boliney Municipal Agriculture Office (MAO) nga adda ti natay a pito a baboy sadiay Danac East ken Danac West.

-- Advertisement --

Maibasar iti rekord idi April 16, 2021, dumanonen iti 12 a baboy ti pakabuklan a natay sadiay Boliney.

Nailanad met iti report ti Boliney MAO a maysa a residente ti Barangay Danac ti nangiyawid iti naanop daytoy nga alingo sakbay a napasamak dagiti panakatay dagiti baboy.

Impaulog metten ti lokal a gobyerno ti Boliney, Abra ti Executive Order No. 10, series of 2021 a mangiparparit iti panangiyuneg ken panangiruar ti karne ti baboy ken alingo iti nasao nga ili.

Temporario pay a naiparit ti panaganup iti kabakiran a masakupan ti Boliney.

Maipatungpal met ti biosecurity measures kas iti depopulation, disinfection, ken regular reporting babaen kadagiti barangay officials ken lokal a gobyerno.

Maibasar iti rekord, ti Boliney ti maikapat a munisipyo sadiay Abra a nakailista iti kaso ti ASF, kalpasan ti panakaideklara ti outbreak ti ASF sadiay Malibcong, Daguioman ken Tineg.