BAGUIO CITY – Sumangsango iti kaso a panaglabsing iti RA 11332 wenno “Mandatory Reporting of Notifiable Diseases and Health Events of Public Health Concern Act” ti kapitan ti Barangay San Mariano, Santa Marcela, Apayao.

Binigbig ni Police Regional Office Cordillera Regional Director PBGen. Ronald Oliver Lee ti nasao nga indibidual a ni Bobby Daquioag, 52-anyos.

-- Advertisement --

Maibasar iti report, idi Lunes, June 7 ket nakaawat ti Santa Marcela Municipal Police Station iti awag manipud kenni Santa Marcela Mayor Evelyn Martinez seknan iti reklamo iti maatap a panakalabsing ti RA 11332 iti kallaysa a naangay iti pagtaengan ni Eddie Corpuz sadiay Barangay San Mariano idi pay May 28, 2021.

Nangisumitir ni Mayor Martinez iti sumagmamano a ladawan a naala kabayatan ti okasyon ken makita kadagiti ladawan ti bilang dagiti dimmar-ay a mailabsing iti standard health protocol.

Nakabiruk met dagiti pulis kadagiti testigo a nangkumpirmar iti panakaisayangkat ti pasken a dinar-ayan ti adu a sangaili a pakairamanan ni Punong Barangay Daquioag.

Kinuna pay ni Mayor Martinez a saan daytoy a nangited ti aniaman a clearance wenno pammalubos para iti panakaisayangkat ti nasao a selebrasyon gaputa adda paylaeng ti Apayao iti sidong ti Modified Enhanced Community Quarantine (MECQ).

Maibasar iti pagalagadan, maiparit ti panakaisayangkat ti aniaman a panagurnong iti ruar ti babbalay kabayatan ti MECQ.