BAGUIO CITY – Agtultuloy ti panangimplementar ti Land Transportation Office (LTO) – Cordillera iti kampanya kontra kadagiti colorum a lugan.

Sigun kenni LTO-Cordillera Regional Director Francis Ray Almora, dumanonen iti 15 a colorum a lugan ti natilliwda manipud idi Enero agingga Hunyo ti agdama a tawen.

-- Advertisement --

Kinuna a modus dagiti colorum a lugan ti agpa-arkila wenno mangidiaya ti biyahe iti publiko ngem agsingirda iti dakkel a plete kadagiti pasahero a nagbatad a panaglabsing iti paglintegan ti Land Transportation Franchising and Regulatory Board.

Kinunana metlaeng a saan laeng a dagiti van ti agbalbalin a colorum ita no di ket pakairamanan metten dagiti SUVs ken dagiti trak a mabaybayadan tapnu adda pagluganan dagiti awan ti paglugananda.

Malaksid iti daytoy, dinakamat ni Almora a bambantayanda metlaeng ita dagiti tourist transport gaputa adda dagiti saan a mangsursurot iti pinirmaanda a prangkisa malaksid pay nga agsingirda ti plete ti tunggal pasahero ken naobserbaran ti saan a panakamintinir ti one-meter distancing dagiti pasahero.

Inlawlawag manen ti opisyal a saan a natalged ti opersyon dagiti colorum a lugan gaputa saan dagitoy a dimmalan iti inspeksyon ti LTO ken awan ti insurance dagiti pasahero iti kanito a mapasamak ti aksidente ken saan pay a maipasigurado ti kinatalged dagitoy.

Sigun pay kenni Almora, dakkel ti posibilidad a manayunan ti bilang dagiti parapubliko a lugan nga agbiahe iti lokalidad kagiddan ti panakapalukay ti quarantine status ti rehiyon ngem inyunay-unayna a maibasar latta daytoy iti pammalubos dagiti nagduduma a lokal a gobyerno. (with Bombo Janice Juanito)

ni LTO-Cordillera Regional Director Francis Rey Almora