photo | Kapulisan ng Kalinga

BAGUIO CITY – Simmuko kadagiti personnel ti Kalinga Police Provincial Office ti maysa a sigud a militia ng bayan ti komunista a grupo ti CPP-NPA.

Sigun iti pulisya, nagdesisyon ni alyas Ligtas wenno Bagyan, 58-anyos a residente ti Tabuk City, Kalinga tapnu makipaset iti Enhanced Comprehensive Local Integration Program ken dadduma a benipisyo nga ipapaay ti gobyerno kadagiti sumuksuko a rebelde ken mangsupsuportar kadagiti rebelde.

Naamuan a ni alyas Ligtas ket kameng ti Militia ng Bayan iti sidong ti Lejo Cawilan Command, Komiteng Larangang Gerilya Baggas ken nakalista daytoy iti communist-terrorist groups watch list ti Cordillera Police iti maikadua a kwarter ti 2020.

-- Advertisement --

Ti panagsuko ti nasao nga indibidual ket resulta ti nakappia a negosasyon dagiti nagduduma nga yunit ti pulisya ken militar iti koordinasyon ti Provincial Task Force to End Local Communist Armed Conflict ken panakibinnadang dagiti kabaranggay ti nasao nga indibidual, council of elders ken Kalinga Returnees Association.

Iti agdama, adda ti surrenderee iti kustodiya ti pulisya para iti debriefing ken umno a disposisyon daytoy.

Al-allukuyen met ni PCol. Davy Vicente Limmong, dadaulo ti Kalinga Police dagiti dadduma pay a miembro ti komunista a grupo wenno CPP-NPA tapnu sumukodan ken agsublida iti sidong ti gobyerno tapnu makapagnumarda kadagiti tulong ti gobyerno.

Inyapelana pay kadagiti pamilya dagiti rebelde ti panagtulong met dagitoy iti panagkumbinsir kadagiti kabagianda a sumukon manipud iti panagrebelde dagitoy.