photo | ONE Championship

BAGUIO CITY – Nagpirman iti ONE Championship ni Jhanlo Mark Sangiao, anak ni Team Lakay head coach Mark Sangiao.

Iti social media account ni Jhanlo, pinagyamananna ti ONE Championship iti panangitedda kenkuana iti naisangsangayan ken napateg a gundaway nga ag-perform iti global stage ken mangipakita iti kabaelanna ken iti adda iti Team Lakay.

-- Advertisement --

Impeksa pay ti 18-anyos a martial artist ti panagyamanna iti ama ken coach-na a nangsuportar kenkuana manipud nangrugi iti journey-na.

Iti agdama, addaan ni Jhanlo iti 3-0 win-loss a pro mix martial arts record.

Imbinglayna a saanna a ninamnama ti kontrata manipud iti ONE Championship nangruna ta arapaapnan ti makastrek iti nasao a promotion.

Kinunana a magagaran metlaeng daytoy a makilaban kas kadagiti manongna iti Team Lakay.

Inladawan pay ni Jhanlo a naiduma daytoy manipud kadagiti Team Lakay fighters a nalatak iti striking gaputa idi amateur daytoy ket kadawyan nga ilepleppasna dagiti labanna iti ground-and-pound ken submissions.

Kinunana a daytoy to ti padaanan dagiti tattao kadagiti masungad a labanna.

Kabayatanna, impannakkel met ni coach Mark ti kaudian nga achievement ti anakna.

Imbinglayna a maragsakan unay daytoy gaputa adda ti mangituloy iti passion ken arapaapna iti lubong ti martial arts.

Innayonna a ni Jhanlo ket produkto ti amin a dimmalanan ti Team Lakay ken makitanto ti publiko ti baro a henerasyon ti team babaen kenni Jhanlo.

Inaklon met ni Jhanlo nga adda ti pressure gapu kadagiti expectations kenkuana kas anak ni Mark Sangiao.

Nupay kasta, kinunana a nasken laeng a nakasagana daytoy iti kanito nga adda ti dumteng nga oportunidad kenkuana.