BAGUIO CITY – Pinaglibakan ti Cordillera Basic Sectors Transport Cooperative (CBSTC) ti agwarwaras a sayangguseng a saanda nga inyawat ti sweldo dagiti sumagmamano a drivers ti kooperatiba.

Impatangken ni CBSTC Secretary General Rex Bayangan nga impaayda amin a sweldo dagiti drivers ti kooperatiba sakbay a nagkissayda ti drivers, makabulanen ti napalabas.

-- Advertisement --

Impettengna nga adda ti rekord ti CBSTC a mangpaneknek a naipaay ti sweldo dagiti amin a drivers a nagtrabaho iti kooperatiba.

Linawlawaganna metlaeng ti agwarwaras a damag a P350 laeng ti rate dagiti drivers ti kooperatiba manipud iti P700 a naituding nga awaten dagiti drivers dagitoy.

Kinunana a nupay dagiti dadduma a drivers ket on-the-job-training ken naipasidong laeng iti evaluatiuon ket naited met latta ti P700 a rate dagitoy.