-- ADVERTISEMENT --

BAGUIO CITY – Ninayonan ti lokal a gobyerno ti Baguio ti daily limit wenno naituding a bilang dagiti turista a mabalin a mapalubusan a sumrek iti siudad iti innaldaw.

Sigun kenni City Supervising Tourism Operations Officer Alec Mapalo, manipud iti sigud a 2,000 ket pinagbalindan a 3,000 ti daily limit iti bilang dagiti turista a mabalin a sumrek iti siudad iti innaldaw.

Dinakamatna nga iti uneg laeng ti 24 nga oras ket napunnon dagiti slots iti weekend manipud ita nga aldaw, November 26 ken dagiti weekends iti bulan ti Disyembre.

Maibasar iti datus ti Baguio VISITA, manipud ita nga aldaw agingga inton Dominggo ket manamnama a nasurok 9, 200 a turista ti sumangpet iti siudad malaksid pay kadagiti agarup 2,500 a nakaimet ti Blue QR-Coded Tourist Pass (QTP).

Inlawlawagna a ti Blue QTP ket saan a saksakupen ti naituding a daily limit ken dagitoy ket dagiti turista nga agdiretso iti hotel a pagdagusan dagitoy nga addaan ti bukod a triage.

-- ADVERTISEMENT --

Inyunay-unayna a mapapasubli iti nagtaudanda dagiti turista nga awanan ti kaskenan a dokumento, rehistrasyon ken QTP.

Mangnamnama ti lokal a gobyerno ti Baguio nga iti panakailukat ti turismo ti siudad kadagiti fully vaccinated a turista ket makatulong daytoy iti panagrekober ti panagsaranta manen ti industriya ti turismo ti siudad.