-- ADVERTISEMENT --

BAGUIO CITY – Pagsagsaganaan ita ti Cordillera pride ken Miss Earth Philippines 2020 a ni Roxanne Allison Baeyens ti umadani a Miss Earth 2020.

Iti eksklusibo a panakiyuman ti Bombo Radyo Baguio, inaklonna nga adda ti panag-nerbiosna iti manarimaan nga international pageant gapu iti pressure.

Nupay kasta, kinuna ti 23-anyos nga Igorota beauty queen nga ad-adda ti gagarna gaputa ‘once-in-a-lifetime’ nga oportunidad ti panakisalipna iti nasao a beauty pageant.

Dinakamatna a kangrunaan a pagsagsaganaanna ti question and answer ken gaputa maisayangkat ti pageant iti virtual, nakabiruk dagitoy iti istratehiya tapnu ad-adda nga agrimat iti sangwanan ti kamera.

Innayon pay ti Filipino-Belgian nga iti baet ti panakakumikomna para iti Miss Earth 2020 ket saanna met a naliwayan ti adbokasiyana iti agrikultura.

-- ADVERTISEMENT --

Imbingayna a nagbalin a nabunga ti dua a napalabas a bulan gapu iti panagbalinna a poster girl ti Department of Agriculture – Cordillera para iti panakaital-o ti urban gardening, highland agriculture ken re-greening.

Maipalagip a napangabakan ni Baeyens manipud Baguio City ti korona kas Miss Earth Philippines 2020 idi July 2020.

Manarimaan metten dagiti virtual competitions ti Miss Earth 2020 ken maangay ti coronation inton November 29. (report ni Bombo Charles Nikko Limon)