-- ADVERTISEMENT --

BAGUIO CITY – Irekomendar ti Liga ng mga Barangay ditoy Baguio City iti pannakaipatungpal ti home isolation kadagiti mild ken assymptomatic a pasyente ti COVID19.

Iti interview ti Bombo Radyo Baguio kenni Presidente Councilor Michael Lawana, kinunana a panggepda nga irekomendar ti panaghome quarantine dagiti dadduma a pasyente ti COVID gapu iti panagngato ti kaso ken iti pannakapunno dagiti isolation units ditoy syudad

Nupay kasta, inlawlawagna nga ipalubosda laeng ti home isolation no makapasa daytoy iti assesment ken addaan iti kapasidad ti maysa a pagtaengan a mabalin a pakaipatungpalan ti isolation.

Dinakamatna pay nga ikagkagumaanda ita nga agbiruk kadagiti barangay ti syudad nga addaan iti nawaya nga spasyo tapnu agserbi kas barangay isolation centers.

Mainaig iti daytoy, inaklonna nga agkurkurang ti transportasyon wenno ambulansya para ti pannakaibyahe dagiti pasyente ti COVID19 paturong kadagiti isolation centers ti syudad manipod kadagiti barangay.

-- ADVERTISEMENT --

Kinunana a daytoy ti maysa a rason iti panangirekomendarda laengen iti home isolation.

Dinakamatna nga ikagkagumaanda a maipaayan ti tunggal barangay iti bukodda a lugan nga aramaten dagitoy a mangibyahe kadagiti pasyente ti COVID19 iti masakupanda.

Kinunana a nasken laeng nga maipasidong dagitoy a lugan iti assesment ti City Health Services Office tapnu maipaayan iti akreditasyon, makapasa iti standard ken maimuntaran dagiti umno a safety equipment tapnu mabalin a maaramat kas ambulansya.

Malaksid iti daytoy, ginuyugoyna pay dagiti pribado nga indibidual nga addaan iti interes a tumulong wenno mangipabulod iti luganda tapnu maipausar kadagiti barangay kas transportasyon tapnu makibinnadangda laeng iti maseknan a barangay para iti pannakaipasidongda iti nasao nga assesment.

Inlawlawagna a maysa daytoy kadagiti kangrunaan a kasapulan ti syudad gapu iti kina-adu dagiti agpospositibo ti nasao a sakit.