BAGUIO CITY – Adda itan ti Cordillera Region iti high risk iti tay-ak ti hospital care utilization rate kas maibasar iti datus ti Deparment of Health (DOH)-Cordillera idi kalman, October 13.

Maibasar iti rekord, dimmanonen iti 75.63 percent ti average hospital care utilization rate ti rehion.

-- Advertisement --

Sigun kenni DOH-Cordillera Assistant Regional Director Dr. Amelita Pangilinan, adda metten iti critical risk ti hospital care utilization rate ti Baguio City, Benguet ken Mountain Province.

Kinunana nga in-inot a maob-obserbaran ti panagngato ti kaso ti COVID-19 kadagiti nasao a lugar a rason ti panagbalin a kritikal ti hospital care utilization rate dagitoy.

Nupay kasta, kinunana a nainget ti koordinasyonda ita kadagiti maseknan a lokal a gobyerno para iti panakanayon dagiti isolation beds a mang-akomodar kadagiti pasyente ti COVID-19.

Naamuan a ti hospital care utilization rate ti Baguio City ket 87.01%, ti Benguet ket 94.37% ken ti Mountain Province ket 92.25%.

Maibilang met a high risk ti utilization rates ti Ifugao ken Kalinga bayat a moderate risk ti Apayao ken low risk ti Abra.

Kabayatanna, dumanonen iti 84,184 ti pakabuklan a kaso ti COVID-19 iti Cordillera a bukbuklen ti agarup 12,800 nga aktibo a kaso; nasurok 69,900 a naimbagan ken 1,423 nga ipupusay.

Dumanon metten iti agarup 414,900 nga umili ti rehion ti fully vaccinated bayat a nailukat ti panagparehistro dagiti 15-17-anyos nga ubbing iti Baguio City kas panagsagana iti panagbakuna kadagitoy kontra iti COVID-19 iti kabiitan a panawen.