BAGUIO CITY – Agtultuloy ti imbestigasyon dagiti otoridad iti pakabigbigan ti indibidual a nangibelleng iti fetus wenno maladaga iti maysa a pagbasuraan nga asideg iti maysa nga one-stop-shop home finishing store sadiay Km. 4, Marcos Highway, Bakakeng Central, Baguio City idi kalman.

-- Advertisement --

Maibasar iti report ti pulisya, manarimaan ti panangikabil dagiti garbage collector kadagiti basura iti garbage truck idi nakita ti maysa kadagitoy ti bassit a karton.

Linuktanda ti nasao a karton ken ditoy a nakitada ti dara-dara a maladaga a nabalkot ti puraw a t-shirt.

Dagus nga inturongda ti karton iti istasyon ti pulisya sakbay nga inturongda iti maysa a simbaan para iti panakabendisyon ti maladaga ken inkalida iti Baguio Public Cemetery.

Iti agdama, suksukimatenda dagiti video footages dagiti CCTV cameras a nakamuntar iti asideg ti pagbasuraan a nakasarakan ti nasao a maladaga.