-- ADVERTISEMENT --
photo | Baguio City PIO

BAGUIO CITY – Ad-adda pay a napatibker ti partnership wenno panagbinnadang ti lokal a gobyerno ti Baguio ken ti European Union nga indauluan ni European Union Ambassador Luc Veron iti panagsarungkarna ditoy siudad.

Napagsaritaan ti ambassador ken ti mayor ti siudad dagiti programa ti Baguio iti watershed recovery and preservation, risk reduction babaen iti geo-hazard mapping ken rainwater preservation babaen kadagiti dadakkel a pagurnongan ti danum.

Inyunay-unay ti mayor a manarimaan dagiti addang tapnu masubli dagiti watersheds kasaruno ti panangdakamatna kadagiti addang ti lokal a gobyerno tapnu marisut dagiti parikut iti kalkalsada, sewage system, public transport system ken iti air quality ti siudad.

Impannakkelna pay dagiti nagduduma a naaramidan ti lokal a gobyerno iti kampanya kontra iti korapsion ken iti agdama a COVID-19 pandemic.

Kabayatanna, simmarungkar metlaeng ti UE Ambassador to the Philippines sadiay Itogon, Benguet ken timmulong daytoy iti panagiwaras ti Early Warning Kits iti siyam a barangay ti munisipyo.

-- ADVERTISEMENT --

Maaramat iti panawen ti kalamidad dagiti naiwaras a kits a naglaon ti LED spotlights, rechargeable lights, megaphones ken dadduma a kagawaan.

Impaimana met ti Inclusive Disaster and Climate Risk Governance Module iti civil society ken local government unit a maitunos iti EMPOWER Project ti EU.

Puntirya ti EMPOWER Project a mapatibker ti kinatibker dagiti high-risk communities iti disaster and climate risk governance.

Naamuan a ti panagsarungkar ni Ambassador Veron iti lokalidad ket paset ti “Indigenous Peoples Champions from the Philippines” a proyekto ti EU no sadino, adda ti impalusposda a P14-M a maaramat iti panakasuportar dagiti nainsigudan nga umili ti Bangsamoro ken Cordillera para iti panakasalwad ken panakaital-o dagiti karbengan dagiti nainsigudan a tattao.